احمد فؤاد نجم الى حسني مبارك, عيد ميلاد الريس(ربنا يحفظه) والحدق يفهم

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين
[size="4"][/size]

ههههههههههههههههههههههههههههههههههههههه

تسلمي يا موها عالموضوع

بجد جميل جداا يسلم فعلاا احمد فؤاد نجم علي كلامه الجميل ودايما بحب كلامه

انت الى ميرسيى اووى يا مودى على مرورك واهتمامك

مها مش لاقى هديه اهديهالك على الكلام ده الا انى اقولك

ربنا يحفظك ويكرمك ويخليكى

بجد تسلملى ايدك يالغاليه على الكيلام ده

وعلى فكره الانسان المصرى الى جوايا الى بيقولك كدا والايرانى بردوا

بجد يا قاموس عمرى ما حسيت غير انك مصررى
وده يشرفنا جداا
وانا الى بشكرك جداا لمتابعه المو ضووعات والا هتمام بالرد عليها
وهديتى ان احنا نكون ايد واحده والمنتدى ده يكون احسن واشهر المنتدياات